मुळात प्रत्येक ऋतूचा आपल्या शरीरावरही काही न काही परिणाम होतच असतो. त्याप्रमाणे पावसाळ्या मध्ये पचन मंद होते. अनेकदा खूप भूक लागत नाही. या ऋतूमध्ये आम्लपित्त होते. त्यामुळे घशाशी आंबट पाणी येणे, मळमळ होणे,क्वचित आंबट कडू उलटी होणे असे त्रास होतात.

थंड व दमट हवेमुळे सर्दी, ताप,खोकला येणे असे त्रास होतात.दमा असणाऱ्या लोकांना या हवे मध्ये दम जास्त लागतो. हल्ली डासांमुळे होणाऱ्या डेंगू सारख्या आजारांचे प्रमाण या हवेत जास्त वाढते. यासाठी काय करावे ?

खरे तर आजार होतात कारण आपली प्रतिकार शक्ती पुरी पडू शकत नाही. ती पुरेशी नसते कारण रोजच्या जीवनशैलीमध्ये आपण नियमित चांगला सकस आहार घेणे, पुरेशी झोप घेणे व नियमित व्यायाम करणे या गोष्टी सातत्य ठेवून करत नाही. जर या गोष्टी नियमित केल्या तर हवामानातील बदल किंवा छोटे क्वचित आहारातील बदल हे तितकेसे त्रासदायक ठरत नाहीत. त्यामुळे रोजच्या रुटीन मध्ये वरील तीन गोष्टी पाळाव्या.