उन्हाळ्यातील आहार | उन्हाळ्यात आहार कसा असावा | उन्हाळी लागणे उपाय

या वर्षी उन्हाळ्याने सीझनच्या सुरुवातीलाच उग्र स्वरूप धारण केले आहे. आपण निसर्गाचा करीत असलेला अपमान आपल्याला त्याची शिक्षा आता देऊ लागला आहे असेच म्हणावयास हवे. सिमेंट चे वाढलेले जंगल, कमी झालेली झाडे, पाण्याचा गैरवापर आणि प्रदूषण या सगळ्यांमुळे पृथ्वी अधिकाधिक तापू लागली आहे. त्याचाच परिणाम आपल्या शरीरावर होतो. त्यामुळे उन्हाळा सुरु झाला कि उन्हाच्या गरम झळा लागतात. घाम येतो. अंगाची काहिली होते. डोळ्यांची आग होते.

दुपारच्या वेळी खूप उन असताना थकवा जाणवतो.काहीही करू नये, बसून राहावे असे वाटते. स्त्रीयांना स्वैपाक घरामध्ये या दिवसात काम करणे म्हणजे खरी शिक्षा असते. उन्हाळा म्हणजे अंगातील शक्ती खेचून घेणारा सीझन.

आयुर्वेदामध्ये काळाचे २ भाग पडले आहेत. एक, विसर्ग काल व दुसरा आदान काल. विसर्ग काळामध्ये साधारणपणे ऑक्टोबर ते जानेवारी पर्यंतचा काल येतो. संक्रांति नंतर संक्रमण झाले की सुरु होणाऱ्या उन्हाळ्याच्या काळास आदान काल असे म्हटले जाते.

विसर्ग काळामध्ये होऊन गेलेला पाउस,तयार पिके, भाज्या फळे यामुळे निसर्ग आणि माणूस दोघेही ताजेतवाने व टवटवीत राहतात.या काळात भूक व पचनशक्ती दोन्ही उत्तम असल्याने माणसाची ताकद चांगली वाढते.

याउलट, उन्हाळ्यामध्ये उष्मा वाढतो,निसर्ग तापतो.त्याचा त्रास माणसानाही होतोच.त्यामुळे गळून गेल्यासारखे वाटते. ताकद कमी होते. उन्हामुळे खाण्याची इच्छा कमी होते.तहान जास्त लागते. अशावेळी आपले खाणे पिणे कसे असावे ? कारण उन्हाळ्यामध्ये होणाऱ्या या त्रासांसाठी विशिष्ट औषधे घेण्या आधी आपल्या खाण्यापिण्याचे काही नियम पाळल्यास त्रास नक्कीच कमी होतो.